చైనాలో పుట్టిన కరోనా వైరస్ ప్రస్తుతం ప్రపంచ దేశాలను వణికిస్తోంది. ఇక మ‌న దేశంలో రోజు రోజుకు రికార్డు స్థాయిలో కోవిడ్ పాజిటివ్ కేసులు న‌మోదు అవుతున్నాయి. ఇప్పటికే అనేక మంది ప్ర‌జాప్ర‌తినిధుల‌కు కోవిడ్ పాజిటివ్ సోకింది. ఈ క్ర‌మంలోనే తిరుప‌తి ఎంపీ బ‌ల్లి దుర్గాప్ర‌సాద్ సైతం కరోనాతో మృతి చెందిన సంగ‌తి తెలిసిందే. ఇక ప‌లువురు ఎంపీలు సైతం కరోనా భారీన ప‌డ్డారు. ఇక కేంద్ర మంత్రులు వ‌రుస‌గా కరోనా భారీన ప‌డుతున్నారు.
ఈ క్ర‌మంలోనే ఇద్ద‌రు కేంద్ర‌మంత్రులు రెండు రోజుల వ్య‌వ‌ధిలో క‌రోనాకు గుర‌య్యారు. నిన్న కేంద్ర రవాణా శాఖ మంత్రి నితిన్ గడ్కరీకి కరోనా సోకగా.. తాజాగా కేంద్ర పర్యాటక శాఖ మంత్రి ప్రహ్లాద్ సింగ్ పటేల్‌కు కరోనా నిర్ధారణ అయ్యింది. ఈ విషయాన్ని ఆయన ట్విట్టర్ వేదికగా తెలిపారు. స్వ‌ల్ప అస్వ‌స్థ‌త‌తో కరోనా ప‌రీక్ష‌లు చేయించుకోగా కోవిడ్ పాజిటివ్ వ‌చ్చింద‌ని ఆయన తెలిపారు. ఇప్పటికే కేంద్ర హోంమంత్రి అమిత్ షాతో పాటు సుమారు ఏడుగురు కేంద్ర మంత్రుల‌కు కరోనా వ‌చ్చింది.
