జూనియర్ ఎన్టీఆర్ హోస్టింగ్ చేస్తున్న బిగ్ బాస్ తెలుగు రియాలి షోలో క్రమక్రమంగా హిందీ బిగ్ బాస్ షోలో జరిగినటువంటి ఎపిసోడ్స్ మొదలయ్యాయి. బిగ్ బాస్ షో హౌస్ నుంచి తనను ఇంటికి పంపించేయాలని బర్నింగ్ స్టార్ సంపూర్ణేష్ బాబు చేసిన హడావుడి ఆడియెన్స్‌ని అవాక్కయ్యేలా చేసింది. ఇక్కడ తాను వుండలేను అని ఏడుపు లంకించుకున్న సంపూ.. అందుకు తన అనారోగ్యమే కారణం అని వివరించాడు.తాను ఛాతీ నొప్పికి వినియోగించిన మెడిసిన్ల కారణంగా సైడ్ ఎఫెక్ట్స్ వస్తున్నాయని ఆందోళన వ్యక్తంచేసిన సంపూర్ణేష్.. ఇక తాను ఇక్కడ కంటెస్టెంట్‌గా కొనసాగలేను అంటూ ఏడుపు లంకించుకున్నాడు.
సంపూ ఆవేదన చూసి స్పందించిన తోటి సభ్యుడు ధన్‌రాజ్.. టెన్షన్ పడొద్దని ధైర్యం చెప్పి సంపూర్ణేష్ బాబుకి భరోసా ఇచ్చే ప్రయత్నం చేశాడు. ఒక్క వారం రోజులు ఓపిక పట్టమని… ఆ తర్వాత మీకు ఇంటికి వెళ్లాలని అనిపిస్తే, ఆ తర్వాత అందరం కలిసి ఎలిమినేషన్‌ రౌండ్‌లో డి (సంపూ) పేరే వచ్చేలా చేస్తామని హామీ ఇచ్చారు. మీకు అవసరమైన వైద్య సదుపాయాలన్నీ ప్రత్యేకంగా ఇక్కడే ఏర్పాటుచేయిస్తామని బిగ్ బాస్ హామీ ఇవ్వడంతో సంపూ కాస్తా నెమ్మదించాడు.
సంపూతో మొదలైన ఏడుపు సీన్లని ఆ తర్వాత ఇంకొంతమంది కంటిన్యూ చేశారు. ఇలా మొత్తానికి ఏడుపుగొట్టు సన్నివేశాలతోనే సాగిపోతున్న బిగ్ బాస్‌లో మంచి కిక్ ఇచ్చే ఎంటర్‌టైన్‌మెంట్ ఎప్పుడొస్తుందా ఎదురుచూస్తున్నామంటున్నారు ఆడియెన్స్.
