యంగ్ టైగర్ ఎన్టీఆర్‌తో సినిమా చేయాలని ప్రతి దర్శకుడు కోరుకుంటాడు. ఇప్పటికే పలువురు స్టార్ డైరెక్టర్లు ఎన్టీఆర్‌తో సినిమా చేయాలనే తమ ఆశను వ్యక్తం చేసిన సందర్భాలు మనం చూశాం. కాగా ఇటీవల జోరుగా ప్రచారంలో ఉన్న ఓ వార్తను ఓ యంగ్ డైరెక్టర్ దాదాపు కన్ఫమ్ చేశాడు.
తమిళంలో రాజా రాణి సినిమాతో ఒక్కసారిగా దర్శకుడిగా క్రేజ్ తెచ్చుకున్న దర్శకుడు అట్లీ, ఆ తరువాత స్టార్ హీరో విజయ్‌తో కలిసి తేరీ, మర్సల్ వంటి బ్లాక్ బస్టర్ హిట్లు అందుకున్నాడు. ఇప్పుడు మరోసారి విజయ్‌తోనే కలిసి విజిల్ అంటూ దీపావళి సందడి చేయనున్నాడు ఈ యంగ్ అండ్ సెన్సేషనల్ డైరెక్టర్. అయితే ఎప్పటినుంచో తారక్‌తో అట్లీ ఓ చిత్రాన్ని ప్లాన్ చేస్తున్నాడంటూ తెలుగునాట ఓ ప్రచారం జోరుగా వినిపించింది.
కాగా ఇటీవల జరిగిన విజిల్ ప్రీరిలీజ్ ఈవెంట్‌లో దర్శకుడు అట్లీ ఈ విషయంపై ఓ క్లూ ఇచ్చేశాడు. త్వరలోనే తారక్‌తో తన నెక్ట్స్ మూవీ ఉండబోవచ్చంటూ చెప్పుకొచ్చాడు. దీంతో తారక్ ఫ్యాన్స్ సంతోషానికి అవధులు లేకుండా పోయాయి. విజయ్ లాంటి స్టార్ హీరోకు బ్యాక్ టు బ్యాక్ బ్లాక్ బస్టర్లు అందించిన ఈ హీరో తమ అభిమాన హీరోకు ఎలాంటి కథను రెడీ చేస్తాడో అని తారక్ ఫ్యాన్స్ ఆతృతగా చూస్తున్నారు. కాగా విజిల్ సినిమా దీపావళి కానుకగా అక్టోబర్ 25న రిలీజ్ కానుంది.
