Indian cricket team has created new world records in the recent test series with England. Read below articles to know more details.
ఇంగ్లండ్‌తో ముగిసిన ఐదు టెస్టుల సిరీస్‌లో భారత్ 4-0 తేడాతో సిరీస్‌ని కైవసం చేసుకోవడమే కాదు.. ఎన్నో భారీ రికార్డులు సొంతం చేసుకుంది. భారతీయ ఆటగాళ్లు తమ అద్భుతమైన ఆటతో తమ పేరిట ఎన్నో ఘనతలు సాధించారు. అ వివరాలన్నీ క్రింది విధంగా ఉన్నాయి…
– ఒకే సంవత్సరం మూడు డబుల్‌ సెంచరీలు సాధించిన మొదటి టీమిండియా కెప్టెన్‌గా విరాట్‌ కోహ్లి రికార్డు సృష్టించాడు. అలాగే.. ఈ సిరీస్‌లో కోహ్లి చేసిన మొత్తం పరుగులు 655. ఒక టెస్టు సిరీస్‌లో 600కుపైగా పరుగులు చేయడం కోహ్లికి ఇది రెండోసారి. సునీల్‌ గవస్కర్‌, రాహుల్‌ ద్రవిడ్‌ తర్వాత ఈ ఘనత సాధించి.. కోహ్లీ రికార్డు పుటల్లోకి ఎక్కాడు. దీంతోపాటు.. టెస్టుల్లో 4000వేల పరుగుల మైలురాయిని దాటిన 14వ భారత బ్యాట్స్‌మన్‌గా విరాట్‌ కోహ్లి నిలిచాడు.
– చెన్నై టెస్టులో కరుణ్‌ నాయర్‌ ట్రిపుల్‌ సెంచరీ కొట్టడం ద్వారా.. ఈ ఘనత సాధించిన రెండో భారత క్రికెటర్‌గా రికార్డు సొంతం చేసుకున్నాడు. మొదటి స్థానంలో విరేందర్ సెహ్వాగ్ రెండు త్రిపుల్ సెంచరీలతో మొదటిస్థానంలో ఉన్న విషయం తెలిసిందే.
– ఈ సిరీస్‌లో రవిచంద్రన్‌ అశ్విన్‌ 306 పరుగులు చేయడంతోపాటు 28 వికెట్లు పడగొట్టాడు. ఇలా ఓ సిరీస్‌లో 25కి పైగా వికెట్లు, 250కిపైగా పరుగులు చేయడం ద్వారా.. ఈ ఘనత సాధించిన రెండో భారత ఆల్‌రౌండర్‌గా రికార్డ్ సాధించాడు.
– వందేళ్ల టెస్టు క్రికెట్‌ చరిత్రలో ఇద్దరు ఆటగాళ్లు 20కిపైగా వికెట్లు పడగొట్టడం, రెండు లేదా అంతకుమించి 50 పరుగులు సాధించడం ఇదే తొలిసారి. ఈ అరుదైన ఘనతని క్రికెటర్లుగా అశ్విన్‌, రవీంద్ర జడేజా సాధించారు.
– 140 ఏళ్ల టెస్టు క్రికెట్‌ చరిత్రలో ఒకే మ్యాచ్‌లో 55 బంతుల్లో 51 పరుగులు చేసి, పది వికెట్లు తీసుకొని, నాలుగు క్యాచ్‌లు అందుకున్నతొలి క్రికెటర్‌గా జడేజా అద్భుతమైన రికార్డు సాధించాడు.
– 2008 తర్వాత ఇంగ్లండ్‌పై భారత్ సాధించిన తొలి టెస్టు సిరీస్‌ విజయం కూడా ఇదే. ఆ తర్వాత జరిగిన మూడు టెస్టు సిరీస్‌లలోనూ భారత్ ఇంగ్లండ్‌ చేతిలో ఓటమిపాలైంది.
– టెస్టుల్లో భారత్ తొలిసారి అత్యధిక స్కోరు (759/7)ను సాధించింది. చెన్నైలో ఐదో టెస్టు తొలి ఇన్నింగ్స్‌లో ఈ ఘనత సొంతం చేసుకుంది.
– టెస్టు క్రికెట్‌లో మూడువేల పరుగులు మైలురాయిని దాటిన 20వ క్రికెటర్‌గా చటేశ్వర్‌ పూజారా, 21వ క్రికెటర్‌గా మురళీవిజయ్‌ నిలిచారు.
– ఇంగ్లండ్‌ జట్టుపై భారత్‌కు ఇదే అతిపెద్ద సిరీస్‌ విజయం.
