టాలీవుడ్ సూపర్ స్టార్ మహేష్ బాబు కెరీర్ లో తిరుగులేని బ్లాక్ బస్టర్ హిట్‌గా నిలిచిన సినిమా ఒక్కడు. 2003 సంక్రాంతి కానుకగా వచ్చిన ఈ సినిమాకు గుణశేఖర్ దర్శకత్వం వహించారు. మహేష్ కి జోడిగా భూమిక హీరోయిన్‌గా నటించ‌గా… సుమంత్ ఆర్ట్‌ ప్రొడక్షన్స్ బ్యానర్ పై ఎమ్మెస్ రాజు నిర్మించారు. ఈ సినిమాలో ప్రకాష్ రాజ్ విలన్ గా నటించారు. ఆ రోజుల్లోనే ఎన్టీఆర్ నాగ సినిమాకు పోటీగా రిలీజ్ అయిన ఒక్కడు ఏకంగా 130 కేంద్రాల్లో 100 రోజులు ఆడి తెలుగు సినిమా చరిత్ర రికార్డులను చాలావరకు చెరిపేసింది. ఒక్కడు ఇలా కనివినీ ఎరుగ‌ని రీతిలో విజయం సాధిస్తుందని ఎవరు ఊహించలేదు.
ఈ సినిమా కథను దర్శకుడు గుణశేఖర్ తాను అసిస్టెంట్ డైరెక్టర్‌గా ఉన్నప్పటి నుంచి రాయడం ప్రారంభించారు. గుణశేఖర్ అసిస్టెంట్ డైరెక్టర్‌గా ఉన్నప్పుడు చెన్నై నుంచి హైదరాబాద్ ఛార్మినార్ దగ్గరికి వచ్చి టీ తాగి వెళుతూ ఉండేవారు. ఆ సమయంలో మధ్యలో ఛార్మినార్.. రెండు గ్యాంగుల మధ్య వార్‌ నేపథ్యంలో కథ రాసుకుంటే బాగుంటుందన్న ఆలోచనకు వచ్చారు. రాజకుమారుడు సినిమా షూటింగ్ నడుస్తుండగా అదే వైజయంతి మూవీస్ బ్యానర్ లో గుణశేఖర్ చిరంజీవితో చూడాలని ఉంది సినిమా నిర్మిస్తున్నారు.
ఆ సమయంలో మహేష్ బాబుతో ఏర్పడిన పరిచయంతో గుణశేఖర్ ఈ కథను మహేష్‌కు చెప్పారు. మహేష్‌కు వెంటనే కథ నచ్చేసింది. అయితే ఆ తర్వాత గుణశేఖర్‌కు చిరంజీవితో చేసిన మృగరాజు రూపంలో పెద్ద డిజాస్టర్ ఎదురైంది. అయినా మహేష్ బాబు మాత్రం గుణశేఖర్ పై ఎంతో నమ్మకంతో ఉన్నాడు. ముందుగా ఈ కథను ఉషాకిరణ్ మూవీస్ బ్యాన‌ర్‌పై రామోజీరావు నిర్మించాలని అనుకున్నారు. రామోజీ ఫిలిం సిటీ లో ఛార్మినార్ సెట్టు కూడా వేస్తానని గుణశేఖర్ కు హామీ ఇచ్చారు.
ఆ తర్వాత ఆయన తప్పుకోవడంతో ఈ ప్రాజెక్టులోకి నిర్మాతగా ఎమ్మెస్ రెడ్డి వచ్చారు. చివరకు ఆయన కూడా చేతులెత్తేశారు. దీంతో మహేష్ స్వయంగా ఎమ్మెస్ రాజు బ్యానర్ లో మనం ఈ సినిమా చేస్తున్నామని గుణశేఖర్ కు చెప్పారు. ఎంఎస్ రాజుకు కూడా గుణశేఖర్ చెప్పిన కథ నచ్చడంతో ఆ రోజుల్లోనే రెండు కోట్ల రూపాయలతో ఛార్మినార్ సెట్ వేశారు. అత్యంత భారీ బడ్జెట్ తో 2002లోనే 14 కోట్ల రూపాయలతో ఒక్కడు సినిమా తెరకెక్కింది. సినిమా తొలి రోజు తొలి ఆటకే సూపర్ హిట్ టాక్ తెచ్చుకుంది.
ఆ రోజుల్లోనే 30 కోట్ల రూపాయలకు పైగా వసూళ్లు రాబట్టి మహేష్ బాబును టాలీవుడ్ లో తిరుగులేని సూపర్ స్టార్ ను చేసింది. అయితే ఈ సినిమాకు ముందుగా అతడే ఆమె సైన్యం అన్న టైటిల్ పెట్టాలని అనుకున్నారు. అయితే అప్పటికే ఆ టైటిల్ మరొకరు రిజిస్టర్ చేసుకోవడంతో గుణశేఖర్ ఎంత బతిమిలాడినా ఒప్పుకోలేదు. ఆ తర్వాత క‌బ‌డ్డీ అన్న పేరు అనుకున్నారు. చివరకు గుణశేఖర్ ఒక్కడు అన్న టైటిల్ చెప్పిన వెంటనే మహేష్ ఓకే చెప్పేశారు. అలా ఒక్కడు సినిమా టైటిల్ పుట్టి మహేష్ కెరీర్ ను మార్చేసింది.
