బాలీవుడ్‌లో ఈ యేడాది వ‌రుస విషాదాలు చోటు చేసుకుంటున్నాయి. ఇప్ప‌టికే ప‌లువురు కీల‌క న‌టుల‌ను ఈ యేడాది బాలీవుడ్ కోల్పోగా తాజాగా మ‌రో టాలెంటెడ్ నటుడు మృతి చెందారు. బాలీవుడ్ ప్రముఖ నటుడు ఫరాజ్ ఖాన్ కన్నుమూశారు. ఆయ‌న కొద్ది రోజులుగా తీవ్ర అనారోగ్యంతో బాధపడుతున్నారు. ఈ క్ర‌మంలోనే ఆయ‌న ఆరోగ్యం మ‌రింత క్షీణించ‌డంతో బుధ‌వారం తుది శ్వాస విడిచారు. ఈ విష‌యాన్ని సీనియ‌ర్ న‌టి పూజాభ‌ట్ తన సోష‌ల్ మీడియాలో షేర్ చేయ‌డంతో పాటు ఫరాజ్ కుటుంబానికి ఈ స‌మ‌యంలో ప్ర‌తి ఒక్క‌రు అండ‌గా ఉండాల‌ని కోరారు.
ఫరాజ్ ఖాన్ కొద్ది రోజులుగా తన ఛాతీ, మెద‌డులో తీవ్ర‌మైన ఇన్‌ఫెక్ష‌న్ సోక‌డంతో బాధ‌ప‌డుతున్నాడు. ఈ క్ర‌మంలోనే ఆయ‌న బెంగ‌ళూరులోని ఓ ప్రైవేటు ఆసుప‌త్రిలో చికిత్స పొందుతున్నాడు. ఫరాజ్ హాస్ప‌ట‌ల్ ఖ‌ర్చులు కూడా భ‌రించే స్థితిలో లేక‌పోవ‌డంతో పూజా భ‌ట్ చేసిన ట్వీట్‌కు స‌ల్మాన్ ఖాన్ స్పందించారు. స‌ల్మాన్ సాయం చేసినా కూడా ఫరాజ్ ఈ లోకం విడిచి వెళ్లిపోవ‌డం బాధాకరం.
కాగా ఫరాజ్ ఖాన్ 1990లో బాలీవుడ్‌లో నటుడిగా ఎంట్రీ ఇచ్చి క్యారెక్టర్ ఆర్టిస్ట్‌గా తనకంటూ ప్రత్యేక గుర్తింపు తెచ్చుకున్నారు. ఫరేబ్, మెహందీ, మైనే ప్యార్ కియా వంటి చిత్రాల్లో తన నటనతో ఆకట్టుకున్నారు.
