టాలీవుడ్‌లో ఇప్పుడు అంతా బయోపిక్ల ట్రెండ్ న‌డుస్తోంది. దివంగ‌త మ‌హాన‌టి సావిత్రి బయోపిక్ సూప‌ర్ డూప‌ర్ హిట్ అయిన‌ప్ప‌టి నుంచి ప‌లువురు బ‌యోపిక్‌ల‌ను తెర‌కెక్కించే ప‌నిలో ఉన్నారు. ఓ వైపు జాతీయ స్థాయిలో వ‌చ్చిన ధోనీ బయోపిక్ హిట్ అవ్వ‌డం.. ఇక ఎన్టీఆర్ బ‌యోపిక్‌లు, వీర‌ప్ప‌న్ బ‌యోపిక్‌లు ఇలా వ‌రుస‌గా బయోపిక్ల హ‌వా న‌డుస్తోంది. అయితే తెర‌కెక్కించిన అన్నీ బ‌యోపిక్‌లు హిట్ అవుతాయ‌న్న గ్యారెంటీ లేక‌పోయినా బయోపిక్ల విష‌యంలో ఓ ఆశ ఉంది.
ఇక ఇప్పుడు దివంగ‌త న‌టి విజ‌య‌నిర్మ‌ల బయోపిక్ తెర‌కెక్కించేందుకు కుమారుడు న‌రేష్ ప్ర‌య‌త్నాలు చేస్తున్నారు. త‌న త‌ల్లి జీవిత చ‌రిత్ర‌ను చరిత్ర‌లో నిలిచిపోయేలా తెర‌కెక్కించే ప్లాన్ చేస్తున్నాడు. ఈ క్ర‌మంలోనే ఇప్పుడు మ‌రో బ‌యోపిక్‌కు రెడీ అవుతోంద‌ట. దివంగ‌త న‌టుడు శ్రీహ‌రి బయోపిక్ తెర‌కెక్కించే ప్ర‌య‌త్నాలు జ‌రుగుతున్నాయ‌ట. ఈ బ‌యోపిక్‌కు సంబంధించిన మెయిన్ లైన్‌ను శ్రీహ‌రి భార్య డిస్కోశాంతి రెడీ చేసింద‌ని… ఇందుకోసం ఆమె ఓ ద‌ర్శ‌కుడితో కూడా చ‌ర్చ‌లు జ‌రుపుతోంద‌ని అంటున్నారు.
ఈ బ‌యోపిక్‌లో శ్రీహ‌రి త‌న‌యుల‌తో పాటు డిస్కోశాంతి కూడా ఓ పాత్ర‌లో న‌టించే అవ‌కాశం ఉంద‌ని అంటున్నారు. అయితే శ్రీహ‌రి పాత్ర‌కు ఆయ‌న త‌న‌యులే న‌టిస్తారా ? లేదా ? మ‌రో హీరో చేస్తాడా ? అన్న‌ది చూడాలి.
