అది వాస్తవంగా రాజశేఖర్ హీరోగా రావాల్సిన సినిమా..ఈ సినిమా దర్శకుడు తేజ కథను మొదట వినిపించింది రాజశేఖర్ కే, సినిమా చేయబోతున్నట్టుగా అనౌన్స్ మెంట్ కూడా వచ్చింది.. అయితే అనూహ్యమైన పరిస్థితుల మధ్య ఆగిపోయింది. ఇప్పుడు దగ్గుబాటి రానా హీరోగా రెడీ అయ్యి, విడుదలకు సిద్ధం అయ్యింది.. ఇదంతా ‘నేనే రాజు, నేనే మంత్రి’ సినిమా గురించి. రానా, కాజల్ హీరోహీరోయిన్లుగా తేజ దర్శకత్వంలో రూపొంది ఈ వారంలోనే విడుదల కానున్న ఈ సినిమా గురించి ఆసక్తికరమైన కబుర్లు వినిపిస్తున్నాయి.
కొన్నాళ్ల కిందట రాజశేఖర్ హీరోగా తేజ దర్శకత్వంలో ఒక సినిమా రూపొందనుందని వార్తలు వచ్చాయి. దానికి ‘అహం’ అనే టైటిల్ ను అనుకున్నట్టుగా కూడా ప్రచారం జరిగింది. కథాచర్చల దశలోనే ఆ సినిమా ఆగిపోయింది. అప్పట్లో రాజశేఖర్ కు వినిపించిన ఆ కథనే తేజ తర్వాత రానాకు చెప్పి మెప్పించాడట.ప్రత్యేకించి సినిమా క్లైమాక్స్ విషయంలో రాజశేఖర్ ఓకే చెప్పలేదని, తేజ చెప్పిన క్లైమాక్స్ లో మార్పులు చేయాలని సూచించినట్టుగా తెలుస్తోంది.
అయితే మార్పులు చేయడానికి ఇష్టపడని తేజ ప్రాజెక్ట్ ను అంతటితో ఆపేశాడట. తేజ చెప్పిన క్లైమాక్స్ కు రానా ఓకే చెప్పినట్టు సమాచారం. ‘నేనే రాజు నేనే మంత్రి’ క్లైమాక్స్ డిఫరెంట్ గా ఉంటుందనే ప్రచారం జరుగుతోంది. ప్రత్యేకించి ట్రాజెడీ ఎండింగ్ అని అంటున్నారు. మరి రాజశేఖర్ చేయాల్సిన సినిమా రానా చేతుల్లోకి వచ్చి రూపొందింది. ఇది ప్రేక్షకులకు ఎలా గుర్తుండిపోతుందో చూడాలి.
