మెగాస్టార్ చిరంజీవి ఈ యేడాది ఇప్పటికే సంక్రాంతి వాల్తేరు వీరయ్య, ఆగస్టులో భోళాశంకర్ సినిమాలో ప్రేక్షకుల ముందుకు వచ్చారు. వాల్తేరు వీరయ్య సినిమా సూపర్ హిట్ కాగా.. భోళాశంకర్ బాక్సాఫీస్ దగ్గర డిజాస్టర్ అయింది. ఈ క్రమంలోనే చిరంజీవి తన పెద్ద కుమార్తె కొనిదెల సుష్మిత నిర్మాతగా… కురసాల కళ్యాణ్ కృష్ణ దర్శకత్వంలో తాను నటించాల్సిన సినిమాను పక్కన పెట్టి బింబిసారా దర్శకుడు మల్లిడి వశిష్ట సినిమాకు గ్రీన్ సిగ్నల్ ఇచ్చారు.
చిరంజీవి కెరీర్ లో 156వ సినిమాగా తెరకెక్కుతున్న ఈ సినిమాను యూవీ క్రియేషన్స్ రు. 200 కోట్ల భారీ బడ్జెట్తో నిర్మిస్తోంది. దసరా పండుగ సందర్భంగా ఈ సినిమా ప్రారంభోత్సవం కూడా జరుపుకుంది. చిరంజీవి నటించిన బ్లాక్ బస్టర్ సినిమా జగదేకవీరుడు అతిలోకసుందరి తర్వాత ఇన్నేళ్ల‌కు చిరంజీవి మళ్ళీ సోషియో ఫాంటసీ కదా నేపథ్యంలో వస్తున్న సినిమాలో నటిస్తున్నారు. ఈ సినిమాకు విశ్వంభ‌ర అనే టైటిల్ ఖరారు చేస్తారని కూడా వార్తలు బయటకు వచ్చేసాయి.
అయితే ఈ టైటిల్ వెనక ఆసక్తికర విషయం కూడా బయటకు వచ్చింది. దేవలోకం, మానవలోకం, పాతాళలోకం అనే ముల్లోకాల కాన్సెప్ట్ ప్రధానంగా ఈ సినిమా కథ ఉంటుందని.. అందుకే ఈ సినిమాకు విశ్వంభ‌ర టైటిల్ ఫైనల్ చేశారని తెలుస్తోంది. ఇక ఈ సినిమాకు ఆస్కార్ అవార్డు విన్న‌ర్ ఎంఎం. కీర‌వాణి మ్యూజిక్ అందిస్తున్నారు. 2025 సంక్రాంతి కానుక‌గా ఈ సినిమాను ప్రేక్షకుల ముందుకు తీసుకు రానున్నారు.
