టాలీవుడ్ సూపర్ స్టార్ మహేష్ బాబు ప్రస్తుతం తన తాజా చిత్రం సర్కారు వారి పాట సినిమాతో బ్లాక్‌బ‌స్ట‌ర్ విజ‌యం తన ఖాతాలో వేసుకున్నాడు. గీత గోవిందం త‌ర్వాత ప‌ర‌శురాం పెట్ల దర్శకత్వం వ‌హించిన ఈ సినిమా మిక్స్ డ్ టాక్‌తో కూడా బాక్సాఫీస్ ద‌గ్గ‌ర వ‌సూళ్ల వ‌ర్షం కురిపిస్తోంది. స‌రిలేరు నీకెవ్వ‌రు త‌ర్వాత మహేష్ న‌టించిన సినిమా కావ‌డంతో మహేష్ క‌టౌట్‌ను థియేట‌ర్లలో చూసేందుకే ఫ్యాన్స్ ఎగ‌బ‌డుతున్నారు. పైగా ఎఫ్ 3 సినిమా వ‌చ్చే వ‌ర‌కు స‌ర్కారుకు పోటీయే లేదు.
దీంతో బాక్సాఫీస్ వ‌ద్ద ఈ సినిమా క్లీన్ హిట్‌గా నిల‌వ‌డంతో పాటు చాలా రికార్డులు తన ఖాతాలో వేసుకోనుంది. కేవ‌లం నాలుగు రోజుల్లోనే వ‌ర‌ల్డ్ వైడ్‌గా రు. 95 కోట్ల షేర్ రాబ‌ట్ట‌డం.. అది కూడా ఓ రీజ‌నల్ లాంగ్వేజ్ సినిమా ఈ రేంజ్‌లో వ‌సూళ్లు కొల్ల‌గొట్టింది అంటే మామూలు విష‌యం కాదు. ఈ సినిమా స‌క్సెస్ ఎంజాయ్ చేస్తోన్న మహేష్బాబు నెక్ట్ మాట‌ల మాంత్రికుడు త్రివిక్ర‌మ్ శ్రీనివాస్ ద‌ర్శ‌కత్వంలో సినిమా చేస్తున్నాడు.
SSMB 28 అనే టైటిల్‌తో ఈ సినిమా ఫిబ్రవరి 2022 లో గ్రాండ్‌గా లాంచ్ చేశారు. గ‌తంలో మహేష్బాబు – త్రివిక్ర‌మ్ కాంబోలో అత‌డు, ఖ‌లేజా రెండు సినిమాలు వ‌చ్చాయి. రెండు సినిమాలు క‌థ, క‌థ‌నాల ప‌రంగా బాగున్నా క‌మ‌ర్షియ‌ల్‌గా మాత్రం స‌క్సెస్ కాలేదు. ఖ‌లేజా 2010లో వ‌చ్చింది. ఈ సినిమా వ‌చ్చి కూడా 12 ఏళ్లు అవుతోంది. మ‌ళ్లీ ఇన్నేళ్ల‌కు వీరిద్ద‌రి కాంబోలో సినిమా కావ‌డం.. ఇటు మహేష్ 4 వ‌రుస హిట్ల‌తో ఫామ్‌లో ఉండడంతో త్రివిక్ర‌మ్ – మహేష్ కాంబోపై భారీ అంచ‌నాలే ఉన్నాయి.
ఈ సినిమా గురించి ఓ అదిరిపోయే అప్‌డేట్ బ‌య‌ట‌కు వ‌చ్చేసింది. ఈ సినిమా టైటిల్ రివీల్ చేసే డేట్ బ‌య‌ట‌కు వ‌చ్చేసింది. మే 31, 2022న అంటే సూపర్‌స్టార్ కృష్ణ పుట్టినరోజున ఈ సినిమా టైటిల్ ప్రకటించాలని టీమ్ ప్లాన్ చేస్తోంది. దీనిపై మేక‌ర్స్ నుంచి అధికారిక ప్ర‌క‌ట‌న రానుంది. ఈ సినిమాలో మహేష్ బాబుకు జోడీగా పూజా హెగ్డే నటిస్తోంది.
ఇటీవ‌ల కాలంలో హీరోయిన్‌ను రిపీట్ చేయ‌ని మహేష్ మ‌హ‌ర్షి త‌ర్వాత పూజా హెగ్డేనే రిపీట్ చేస్తున్నాడు. త్రివిక్ర‌మ్‌కు సొంత బ్యాన‌ర్ లాంటిది అయిన హారిక అండ్ హాసిని క్రియేషన్స్ ఈ చిత్రాన్ని భారీ ఎత్తున నిర్మిస్తోంది. థమన్ ఎస్ ఈ సినిమాకు సంగీత దర్శకత్వం వ‌హిస్తున్నారు.
