స్టైలీష్‌స్టార్ అల్లు అర్జున్ కేవ‌లం టాలీవుడ్‌లోనే కాకుండా మాలీవుడ్‌లోనూ వ‌రుస‌గా రికార్డుల మీద రికార్డులు క్రియేట్ చేసుకుంటూ వెళుతున్నాడు. అల్లు అర్జున్ ఇప్పుడు ఇండ‌స్ట్రీ ప‌రంగా అతి తక్కువ టైంలోనే సూప‌ర్ హిట్ల‌తో ఓ క్రేజీ హీరోగా మారిపోయాడు. ఈ సంక్రాంతికి వ‌చ్చిన అల వైకుంఠపురంలో ఘన విజయాన్ని సాధించి ఎన్నో రికార్డులను తిరగరాసిన సంగతి తెలిసిందే. ప్ర‌స్తుతం అల్లు అర్జున్ సుకుమార్ ద‌ర్శ‌క‌త్వంలో తెర‌కెక్కే పుష్ప సినిమాలో న‌టిస్తున్నాడు. ఈ సినిమా త‌ర్వాత కొర‌టాల శివ ద‌ర్శ‌క‌త్వం వ‌హించే సినిమాలో అల్లు అర్జున్ న‌టిస్తాడు.
ఇదిలా ఉంటే టాలీవుడ్లో అల్లు అర్జున్ మ‌రో అరుదైన రికార్డు త‌న ఖాతాలో వేసుకున్నాడు. ఇన్‌స్టాగ్రామ్‌లో అతి తక్కువ కాలంలోనే 8 మిలియన్ల మంది ఫాలోవర్స్‌ను సాధించిన ఘనత సాధించారు. ఈ సంద‌ర్భంగా త‌న ఫాలోవ‌ర్స్‌కు కృతజ్ఞతలు తెలిపిన అల్లు అర్జున్ 8 మిలియ‌న్స్ అనేది పాపులారిటీ కాద‌ని.. అంతులేని అభిమానం అని.. మీ ఆశీర్వాదాలు.. అంతులేని ప్రేమ‌కు కృతజ్ఞతలు అని తెలిపాడు. ఈ విష‌యాన్ని ఇన్‌స్టాగ్రామ్‌లో రాసుకు వ‌చ్చాడు. ఇంత తక్కువ టైంలో ఓ టాలీవుడ్ హీరో ఈ రేంజ్‌లో ఫాలోవ‌ర్స్ సాధించ‌డం గ్రేటే అని చెప్పాలి.
