దర్శక బాహుబలి ఒక వైపు. తెలుగు ఫిల్మ్ ఇండ్రస్ట్రీలో యంగ్ అండ్ టాప్ క్రేజీ హీరోలైన ఎన్టీఆర్, రామ్ చరణ్ మరో వైపు. ఈ కాంబినేషన్ లో సినిమా అంటే మాములుగా ఉంటుందా ? అంచనాలు ఎక్కడికో వెళ్లిపోతాయి. ఈ టాప్ కాంబినేషన్ లో సినిమా ఎలా ఉండబోతుంది ? స్టోరీ ఏంటి ఇలా సవాలక్ష ప్రశ్నలు అభిమానుల మెదడులో మెదిలిపోతుంటాయి. అసలు ఈ చిత్రానికి ఆర్ ఆర్ ఆర్ అని టైటిల్ పెట్టడం వెనుక రహస్యం ఏంటో తెలియక జుట్టు పీక్కుంటున్నారు.
ఇక విషయానికి వస్తే ఆర్ ఆర్ ఆర్ సినిమా షూటింగ్ మొదలయినప్పటి నుంచి ఏదో ఒక అపశకునం ఈ సినిమాను పట్టి పీడిస్తోంది. తరుచు ఈ సినిమా షూటింగ్స్ లో ఎవరో ఒకరు గాయపడడం, దీని కారణంగా అనేక షెడ్యూళ్లు వాయిదాలపై వాయిదా పడుతున్నాయి. అయితే తాజాగా ఎన్టీఆర్ గాయం కారణంగా ఆర్ ఆర్ ఆర్ షూటింగ్ మరికొన్నాళ్లు వాయిదా వేయడంతో మరోసారి చర్చకు తెరలేచింది.
ఈ సినిమా హీరోయిన్ డైసీ ఎడ్గర్ జోన్స్ తప్పుకోవడం కథ మొదటికి వచ్చింది. వాస్తవానికి ఎన్టీఆర్ సరసన డైసీ నటించాల్సింది. కానీ కుటుంబ కారణాలు చూపుతూ సినిమా నుంచి నిష్క్రమించడంతో మొదటి దెబ్బ తగిలింది. ఆ తరువాత గుజరాత్‌లో షూటింగ్ జరుగుతుండగా ఈ చిత్ర హీరో రామ్ చరణ్ కాలికి గాయం కావడంతో షెడ్యూల్‌ వాయిదా పాడడం మరో దెబ్బ తగిలినట్టయ్యింది.
రాంచరణ్ కోలుకోవడంతో హైదరాబాద్ లో షూటింగ్ ప్లాన్ చేశారు. ఆ షూటింగ్ స్టార్ట్ చేసేందుకు రెడీ అవుతుండగా ఎన్టీఆర్ గాయపడటంతో మూడో దెబ్బ గట్టిగానే తగిలింది. అయితే ఎన్టీఆర్ గాయాన్ని బయటకి పొక్కకుండా ఆ చిత్ర యూనిట్ జాగ్రత్తపడినా ఆయన ఆ గాయానికి చికిత్స కోసం హాస్పిటల్ కి వెళ్లడం అక్కడ ఫొటోస్ మీడియాకు చిక్కడంతో ఆ విషయం బయటకి పొక్కింది. అయితే ఎన్టీఆర్ కి ఆ దెబ్బలు ఎక్కడ తగిలాయి ? ఇంట్లోనా లేక షూటింగ్ లోనా అనే అనుమానాలకు క్లారిటీ రాలేదు.
ఇలా వరుసగా గాయాల సమస్య వేధించడం ఆర్ ఆర్ ఆర్ సినిమాపై ప్రభావం పడే అవకాశం లేకపోలేదు. అదీ కాకుండా ఈ చిత్రంలో బాలీవుడ్ నటులు కూడా నటిస్తుండడం, వరుస వరుసగా షూటింగ్ వాయిదా పడడంతో కాల్షీట్స్ ప్రాబ్లెమ్ కూడా చికాకు తెప్పిస్తోందట. అయితే ఈ సమస్యలన్నీ అధిగమించి షూటింగ్ ఎప్పుడు పూర్తి చేసుకుంటుందో అని అభిమానులు ఎదురు చూస్తున్నారు.
