ఎవడే సుబ్రమణ్యం సినిమాలో ఫ్రెండ్ పాత్ర చేసిన విజయ్ దేవరకొండ పెళ్లిచూపులు సినిమాతో బ్లాక్ బస్టర్ హిట్ అందుకున్న విషయం తెలిసిందే. తరుణ్ భాస్కర్ డైరక్షన్ లో వచ్చిన పెళ్లిచూపులు స్టార్స్ సైతం అవాక్కయ్యేలా కలక్షన్స్ సాధించింది. ఇక ఆ హిట్ క్రేజ్ ను వాడేస్తున్న విజయ్ కెరియర్ విషయంలో ఆచి తూచి అడుగులేస్తున్నాడు.
ద్వారకతో పర్వాలేదు అనిపించుకున్న విజయ్ దేవరకొండ ప్రస్తుతం అర్జున్ రెడ్డి సినిమాతో ప్రేక్షకుల ముందుకు రాబోతున్నాడు. సందీప్ డైరెక్ట్ చేసిన ఈ సినిమా రన్ టైం విషయంలో పెద్ద ధైర్యం చేస్తున్నారు చిత్రయూనిట్. ఏకంగా 2 గంటల 55 నిమిషాల సినిమాగా అర్జున్ రెడ్డి వస్తుంది. అంటే దాదాపు 3 గంటల సినిమా అన్నమాట. కంటెంట్ లోని దమ్ము ప్రేక్షకులను అంత సేపు కూర్చోబెడుతుందని అంటున్నారు దర్శక నిర్మాతలు.
కొత్త కథలకు ఊతమిస్తున్న తెలుగు ప్రేక్షకులను అలరించడానికి అర్జున్ రెడ్డి ఓ కొత్త కథతో రాబోతుందట. అందుకే ఈ సినిమా తప్పకుండా ఎంత రన్ టైం ఉన్నా సరే అలరిస్తుందని చెబుతున్నారు. విజయ్ లాంటి కుర్ర హీరో ఇలాంటి రన్ టైం కలిగిన సినిమాతో ప్రేక్షకుల ముందుకు రావడం కచ్చితంగా తన గట్స్ ను మెచ్చుకోవాల్సిందే. ఈ శుక్రవారం రిలీజ్ అవబోతున్న ఈ సినిమా ఎలాంటి ఫలితాన్ని ఇస్తుందో చూడాలి.
