Movies‘సంక్రాంతికి పోటీ మామూలే.. చిరు సినిమా కూడా విజయం సాధించాలని కోరుకుంటున్నా’:...

‘సంక్రాంతికి పోటీ మామూలే.. చిరు సినిమా కూడా విజయం సాధించాలని కోరుకుంటున్నా’: బాలయ్య

Nandamuri Balakrishna has revealed some interesting topics about his prestigious 100th project Gautamiputra Satakarni in the latest interview. Read below article to know more details.

చారిత్రాత్మక నేపథ్యం ఉన్న సినిమాల మీద సాధారణంగానే ఎనలేని అంచనాలు నెలకొంటాయి. ఆ మూవీలోని భారీతనం, వీరోచిత యుద్ధ సన్నివేశాలు, ఆనాటి చరిత్ర ఆకట్టుకునేలా ఉంటాయి కాబట్టి.. వాటిపై ఆడియెన్స్ ఆసక్తి చూపుతారు. నందమూరి బాలయ్య వందోచిత్రం ‘గౌతమీపుత్ర శాతకర్ణి’ మూవీపైనా అంతకంటే ఎక్కువే క్రేజ్ నెలకొంది. పైగా.. ఇది ఆయన మైల్‌స్టోన్ మూవీ కావడం, క్రిష్‌లాంటి టాలెంటెడ్ డైరెక్టర్ తెరకెక్కించడంతో.. దీనిపై తారాస్థాయిలో అంచనాలు నెలకొన్నాయి. అవి రెట్టింపయ్యేలా బాలయ్య తాజాగా ఇచ్చిన ఇంటర్వ్యూలో మరిన్ని ఆసక్తికరమైన విషయాలు వెల్లడించారు.

‘శాతకర్ణి’ని తాను కావాలని ప్లాన్ చేయలేదని, వందో సినిమా ప్రత్యేకంగా ఉండాలనే ఉద్దేశంతో చాలా కథలు వింటుండగా ఈ స్టోరీ తనకు విపరీతంగా నచ్చిందని బాలయ్య చెప్పారు. తెలుగుజాతి గర్వించదగ్గ వ్యక్తుల్లో ఒకరైన శాతకర్ణి కథని వినగానే తనలో ఉత్సాహం వచ్చేసిందని.. అలాంటి గొప్ప వ్యక్తి స్టోరీని ఆడియెన్స్‌కి చెప్తున్నామన్న ఆలోచన కలగగానే వెంటనే ఒప్పేసుకున్నానని అన్నారు. నిజానికి ఇలాంటి ఒక ప్రత్యేక సినిమా తన వందో మూవీ కావడం పూర్వ జన్మ సుకృతంగా భావిస్తున్నట్లుగా బాలయ్య పేర్కొన్నారు. ఈ చిత్రం తాను ప్రత్యేకంగా కసరత్తులు ఏమీ చేయలేదని.. క్రిష్ గారి విజన్, నాన్నగారు కూడా ఈ సినిమా చేయాలనుకొని ఉండడం లాంటివన్నీ తనని ముందుకు నడిపించాయన్నారు. యుద్ధ సన్నివేశాల కోసం తాను ఎలాంటి శిక్షణ తీసుకోలేదని.. గతంలో ‘ఆదిత్య 369’, ‘భైరవద్వీపం’ చేస్తున్నప్పుడు ఆ మూవీలకు అవసరంటే చేశానని.. ఇప్పుడదే ఉత్సాహంతో ‘శాతకర్ణి’ యుద్ధ సన్నివేశాలు చేశానని అన్నారు.

ఇక దర్శకుడు క్రిష్ గురించి చెబుతూ.. అతడ్ని ప్రముఖ హాలీవుడ్ డైరెక్టర్ స్టీవెన్ స్పీల్‌బర్గ్‌తో పోల్చారు. అంతటి అద్భుతమైన దర్శకుడు క్రిష్ అని పేర్కొన్నారు. ఇంత తక్కువ టైంలోనే ఈ పెద్ద సినిమాని కంప్లీట్ చేసిన క్రిష్ అండ్ టీంకే క్రెడిట్ అంతా దక్కుతుందన్నారు. ఒక మంచి పనిచేస్తున్నపుడు పంచ భూతాలన్నీ మనకు సహకరిస్తాయంటారు. అలా ఈ సినిమా షూటింగ్ జార్జియా, మొరాకో లాంటి ప్రాంతాల్లో చేసినప్పుడు కూడా మాకు ఏ ఇబ్బంది కలగలేదని బాలయ్య చెప్పుకొచ్చారు. హేమమాలిని గురించి చెబుతూ.. గతంలో నాన్నగారి సినిమాలో నటించిన ఆమె.. మళ్ళీ ఇన్నేళ్ళకు తెలుగులో ఒక బలమైన పాత్రతో మెప్పించనున్నారని తెలిపారు. శ్రియ చాలా తెలివైన నటి అని.. ఆమె ఈ సినిమాలో చాలా అద్భుతంగా నటించారని.. కబీర్ బేడి కూడా విలన్‌గా చాలా బాగా చేశారని బాలయ్య చెప్పారు.

తన వందో సినిమా స్థాయికి తగ్గ చిత్రంగా ‘గౌతమిపుత్ర శాతకర్ణి’ని చెప్పుకోవచ్చని.. 2 గంటల 15 నిమిషాల్లో కథకు అవసరమయ్యే అన్ని అంశాలతో క్రిష్ ఒక గొప్ప సినిమా తీశాడని.. సినిమాకు ఏది అవసరమో దాన్నే చెప్పడానికి అందరినీ ఒప్పించడంలో క్రిష్ చూపిన ప్రతిభ వల్లే ఇది సాధ్యమైందని బాలయ్య అన్నారు. ఇక చివరగా చిరంజీవి మూవీ ‘ఖైదీ నెంబర్ 150’ పోరుపై ఆయన మాట్లాడుతూ.. పండక్కి సినిమాల మధ్య పోటీ ఉండడం అన్నది ఎప్పుడూ ఉంటుందని, ముఖ్యంగా సంక్రాంతికి ప్రతిసారీ రెండు పెద్ద సినిమాలు పోటీ పడుతూనే ఉంటాయని, ఇప్పుడొస్తున్న చిరు, తన సినిమాలు రెండు ప్రతిష్టాత్మకమైనవేనని, ఈ రెండు సినిమాలూ విజయం సాధించాలని కోరుకుంటున్నానని బాలయ్య వెల్లడించారు.

మ‌రిన్ని సినిమా వార్త‌ల కోసం ఈ లింక్ క్లిక్ చేయండి

Latest news